Iꞌꞌjouꞌ Mánhˉ Jáhˉ Tlacoatzintepec

Jauꞌ guiohꞌ tsǿꞌñinꞌ meinhꞌꞌ tsøˉnanhˍ jáhˉ naunˉ

Jauꞌ guiohꞌ tsǿꞌñinꞌ meinhꞌꞌ tsøˉnanhˍ jáhˉ iꞌꞌnaunˉ, ñinꞌꞌs ninꞌꞌjmonꞌ taꞌꞌ guiohꞌ janˉ guiáhˉ

Chanꞌ jnanꞌ kounˉ jauꞌ liáhˉ káˉlǿꞌꞌ guiohꞌ janˉ tsǿꞌñinꞌ meinhꞌꞌ tsøˉninꞌꞌjmonꞌ taꞌꞌ guiohꞌ janˉ guiáhˉ.

janˉ tsǿꞌñinꞌ meinhꞌꞌ, manˉtáꞌ ngǿnꞌꞌs iꞌꞌnaunˉ, zánhˉs jánhˉ kiónhˍs tsaøˉ meinhꞌꞌ johꞌ̱ꞌ. Kounˉ jmaønˉ káˉlǿꞌꞌ nénˍ, káˉguiuˋ janˉ guiáhˉ guiohꞌ tsǿꞌñinꞌ meinhꞌꞌ éinˉ íˉtsáˍjmónˉs taꞌꞌ guiohꞌ guiahˉ éinˉ.

Jonˉ káˉjuáhˉ guiáhˉ káˉzáihˉs tsǿꞌñinꞌ meinhꞌꞌ éinˉ:

--- Táꞌ mønꞌꞌ kuóhꞌ nunˉ mønꞌꞌguaꞌꞌonhꞌ̱ꞌonˉ kuuˉ guionꞌonꞌꞌ dihꞌꞌ

---juáhˉ guiahˉ záihˉs tsǿꞌñinꞌ meinhꞌꞌ éinˉ.

Jonˉ káˉngáønˉ tsǿꞌñinꞌ meinhꞌꞌ éinˉ:

---Jánhˍ taˉ jnanꞌ líˉ jmonꞌ̱ꞌ taꞌꞌ guiohꞌ tsouˉ, guiaꞌꞌ jmonˍ taꞌꞌ siáhˉpa jnanꞌ guionꞌ ---káˉjuáhˉ tsǿꞌñinꞌ meinhꞌꞌ éinˉ--, taꞌꞌ íˉngǿnˉønꞌꞌ iꞌꞌnaunˉ, guiaꞌꞌ zeinhˍ janˉ tsaøˉ meinhꞌꞌ jónhˉonꞌꞌ, manˉtáꞌ zánhˉs jáhˉ --juáhˉs.

Jonˉ juáhˉ guiáhˉ éinˉ nionꞌ̱ꞌ nénˍ:

---Mønꞌꞌjmónhꞌ tsónˍpa nunˉ dihꞌꞌ mønꞌꞌkuóhꞌoˉ kounˉ jmaønꞌꞌ nénꞌꞌ, guiaꞌꞌ manˉtáꞌ chiꞌꞌkiánꞌ tsǿnꞌꞌønꞌꞌ tsouˉ ónꞌꞌ kuuˉ. Guiaꞌꞌ éinˉ kuuˉ ninꞌꞌjuáhˉ káˉtáhˉ jmǿnˉ ---juáhˉ guiáhˉ éinˉ záihˉs tsǿꞌñinꞌ meinhꞌꞌ éinˉ.

Jonˉ káˉngáønˉ tsǿꞌñinꞌ meinhꞌꞌ éinˉ nénˍ:

---Kínhˍ taˉ jnaꞌ líˉngønꞌpa jmonˍ tsaøˉ meinhꞌꞌ jónhˉ ---juáhˉs---, guiaꞌꞌ liáhˉ manˉnanhˍ jáhˉpa tsøˉ mønꞌꞌtøꞌ̱ꞌ káˉchonˋonꞌꞌ iꞌꞌnaunˉ ---juáhˉs.

Manˉtáꞌ tsónˍjmonˍ guiáhˉ éinˉ, jonˉ káˉkønˉ tsǿˉ tsǿꞌñinꞌ meinhꞌꞌ éinˉ.

Nainꞌ̱ꞌpa jnanꞌ ninꞌꞌ jonˉ ---káˉjuáhˉs---, guiaꞌꞌ jánhˍ taˉziaˉ íˉjuáhꞌ nun ninꞌꞌjuáhˉ káˉɇ́nꞌꞌ tsaøˉ jónhˉ jnanꞌ jáhˉ ---juáhˉs.

Jonˉ ngónnꞌꞌ tsǿꞌñinꞌ meinhꞌꞌ éinˉ jeꞌ̱ꞌ guiohꞌ guiáhˉ éinˉ. Kónhˉ jonˉ mánˍlioˋpa tsǿꞌñinꞌ meinhꞌꞌ éinˉ kánˉ kuuˉ, liáˉkónhˉ káˉjíˉ tsaøˉ meinhꞌꞌ johꞌ̱ꞌs iꞌꞌnaunˉ.

Jonˉ káˉjuáhˉs káˉzáihˉs guiáhˉ éinˉ:

Jéhˍ ---juáhˉs káˉjuánhˍpa jnanꞌ mønꞌꞌ liáˍjánꞌꞌ ---juáhˉs---, jánhˍ taˉ jnanꞌ líˉngønꞌ, jmonˍ tsaøˉ meinhꞌꞌ jónhˉ ---juáhˉs--. Jéhˍ ; jnonˉ manˉ iꞌꞌjiꞌs nionꞌ̱ꞌ ---juáhˉs.

Jonˉ káˉjuáhˉ guiáhˉ éinˉ güehˍ:

Kuaˉ nunˉ iꞌꞌiꞌꞌjiꞌ tsaøˉ gonˋ güehˍ, guiaꞌꞌ áinhˍ tsaøˉ jmónꞌꞌ ninꞌꞌ jonˉ --juáhˉ guiáhˉ éinˉ.

Jonˉ ngónꞌꞌ tsǿꞌñinꞌ meinhꞌꞌ éinˉ iꞌꞌiꞌꞌjiꞌ tsaøˉ jonˉ. Konꞌ̱ꞌonꞌꞌ mønꞌꞌ káˉchoˋs iꞌꞌjíˉ tsaøˉ jonˉ, sáˉ nainhˍ touˉ jíˉ tsaøˉ éinˉ mønꞌꞌ káˉchoˋs.

Jonˉ káˉmánˍlioˋ tsǿꞌñinꞌ meinhꞌꞌ éinˉ kiahˍ touˉ jonˉ kiónhˍs janˉ tsǿꞌñinꞌ meinhꞌ tsøˉ tíˉ jauꞌ kiónhˍs.

Tsaøˉ meinhꞌꞌ johꞌ̱ꞌs nénˍ, jánhˍ taˉ kuéꞌꞌs íˉkiáhˍ tsǿꞌñinꞌ meinhꞌꞌ éinˉ touˉ jonˉ, guiaꞌꞌ guiounꞌꞌ tsaøˉ meinhꞌꞌ éinˉ nainhˍ touˉ jonˉ. Tsaøˉ meinhꞌꞌ éinˉ nénˍ, chiꞌꞌkuhˍs kaunˍ jáhˉ guiounꞌꞌ nainhˍ touˉ jonˉ.

Káˉjónˉpa tsǿꞌñinꞌꞌ meinhꞌꞌ éinˉ jáhˉ tionhꞌꞌ mønꞌꞌ káˉjlǿˉ touˉ jonˉ; káˉliáˉpaǿhˍ jniáˉ kaunˍ jáhˉ éinˉ mønꞌꞌ káˉjónˉ.

Taˉ chánhˉ liáˉguionˉ tsǿˉ tsǿꞌñinꞌ meinhꞌꞌ éinˉ guiaꞌꞌ káˉjónˉs juhꞌ johꞌ̱ꞌ léinˉ, guiaꞌꞌ jmánhˍ liáˉ jáhˉ kanhꞌꞌpa zánhˉ tsaøˉ johꞌ̱ꞌs dihꞌꞌ. Neinꞌꞌ káˉjónˉpa tsøˉ jáhˉ éinˉ.

Jonˉ káˉjionˋ tsǿꞌñinꞌ meinhꞌꞌ éinˉ jáhˉ éinˉ. Tanꞌꞌ liáˉtionhꞌꞌs juøˍ nénˍ, jonˉ káˉjuáhˉ tsǿꞌñinꞌ meinhꞌꞌ éinˉ záihˉs tsǿꞌñinꞌ meinhꞌꞌ tsøˉtíˉ jauꞌ kiónhˍs:

Einˉ niunꞌ líˉjonˍ jáhˉ lánꞌꞌ ---juáhˉs.

Jonˉ káˉngáønˉ tsǿꞌñinꞌ meinhꞌꞌ tsøˉkiónhˍs éinˉ:

----Niúnhˉ nunˉpa líˉ jonˍ jáhˉ lánꞌꞌ, lenꞌ̱ꞌ jnanꞌ ---juáhˉꞌꞌs, guiaꞌꞌ nunˉ johˍ tsaøˉ ---juáhˉs.

Jonˉ káˉjjonˋ tsǿꞌñinꞌ meinhꞌꞌ tsøˉjohꞌ̱ꞌ tsaøˉ éinˉ jáhˉ éinˉ niunꞌ. Mønꞌꞌ káˉchánhˍs tionhꞌꞌ nénˍ, jonˉ káˉmánˍ jonˋs jáhˉ éinˉ. Mønꞌꞌ káˉjonˍ jáhˉ éinˉ nénˍ, jonˉ káˉjmónˉs mánˍjoꞌ guiohꞌ jáhˉ éinˉ tionhꞌꞌ.

Tsǿꞌñinꞌ meinhꞌꞌ tsøˉjohꞌ̱ꞌ tsaˉ éinˉ nénˍ, jánhˍ taˉ zianˋ zioꞌs jmaønꞌꞌ jonˉ. Jonˉ jánhˍ taˉñenˍs éhˉ tohˍ tsouˉ jmaǿnhꞌ guiohꞌ juhꞌ, guiaꞌꞌ zioꞌpatsøˉ tønˉ jmonˍ jmáønhꞌ dihꞌꞌ. Jonˉ ngónꞌꞌs ninꞌꞌngaønꞌ iꞌꞌkonˍ tsøˉmǿnˉ tsøˉkuáˉ tsaihˍ niunꞌs.

Jonˉ juáhˉs záihˉs tsøˉmǿnˉ éinˉ:

--Éhˉ tohˍ tsouˉ jmáønhꞌ guiohꞌ juhꞌ ---juáhˉs.

Jonˉ juáhˉ tsøˉmǿnˉ éinˉ :

---Tóunꞌꞌ neinꞌꞌ liáhˉ jmonˍ tsouˉ jmáønhꞌ guiohꞌ juhꞌ ---juáhˉ tsøˉmǿnˉ éinˉ---. Jmonˍpa tsouˉ guiohꞌ juhꞌ aiˍ kóhˍ søˉ nionꞌ̱ꞌ. Íˉjonˉ nénˍ, jmonˍs aꞌꞌ kanꞌꞌ tónhˉs manˉkuuˍ. Ninꞌꞌjuáhˉ taˉ zúnꞌꞌ nunˉ liáˉnenˉ nénˍ, líˉiꞌꞌchihꞌ̱ꞌpa nunˉ søˉ liáhˉ lǿˉ nenˉ, jonˉ tónhꞌ nunˉ manˉjonˍ --juáhˉs.

Jonˉ juáhˉ tsøˉmǿnˉ éinˉ güehˍ:

Nainꞌ̱ꞌ jnanꞌ ninꞌꞌjmonˋ manˋ guiáhꞌ nunˉ güehˍ, ninꞌꞌjuáhˉ taˉzianˋ ziohˍ nunˉ ---juáhˉs.

Jonˉ ngónꞌꞌ tsøˉmǿnˉ éinˉ niunꞌ tsǿꞌñinꞌ meinhꞌꞌ éinˉ, liáhˉ manˉkianˍspa tsøˉ liáˉjøˋ íˉtohˍs jmáønhꞌ. Jonˉ juáhˉ tsøˉmǿnˉ éinˉ mønꞌꞌ káˉchoˋ:

---Lanꞌ jnanꞌ kounˉ kilo ngúnˉ guiohꞌ jáhˉ nénꞌꞌ dihꞌꞌ ---juáhˉs---, mønꞌꞌkúhˍ tǿꞌꞌ. Guiaꞌꞌ jánhˍ taˉ ngúnˉ káˉjniónꞌꞌ jnanꞌ nénꞌꞌ --juáhˉs.

Konꞌ̱ꞌonꞌꞌ mønꞌꞌ káˉjéˉ tsøˉmǿnˉ éinˉ ngúnˉ jonˉ nénˍ, sáˉ ngúnˉ guiohꞌ tsáˉjauꞌ tióhˍ mánhꞌ mønꞌꞌ káˉjéˉs, guiaꞌꞌ liáhˉ ronˋ jonˉ kaunˍ jauꞌ guiꞌꞌ nainhˍ manhꞌ jonˉ; káˉliáˉpáøhˍpa ronˋ.

Jonˉ juáhˉ tsøˉmǿnˉ éinˉ záihˉs tsǿꞌñinꞌ meinhꞌꞌ éinˉ:

Guaˉ ngúnˉ guiohꞌ jauꞌpa laˉ --juáhˉs. Léinꞌ páøhˍ kaunˍs --juáhˉs.

Jonˉ káˉngáønˉ tsǿꞌñinꞌ meinhꞌꞌ nénˍ:

---Íˉjonˉpa páøhˍ kaunˍs, guiaꞌꞌ liáˍkuhˍ tsaøˉ liáhˉ mønꞌꞌguiounꞌꞌs tounˉpa ---juáhˉ tsǿꞌñinꞌ meinhꞌꞌ éinˉ, záihˉs tsøˉmǿnˉ éinˉ.

Jonˉ juáhˉ tsøˉmǿnˉ éinˉ:

---Kónˉjonˉ lanꞌpa jnan; jánhˍ taˉ nenˉ léinꞌ ---juáhˉs. Ngúnˉ guiohꞌ kíˉ junꞌunꞌꞌ tǿꞌꞌ ---juáhˉs.

Jonˉ káˉláꞌꞌ tsøˉmǿnˉ éinˉ liáˉjøˋ ngúnˉ jonˉ güehˍ, jonˉ káˉjmónˉs manˋ íˉkáˉkuhˍ tǿꞌꞌ.

Jonˉ juáhˉ tǿꞌꞌ tionhꞌꞌ mønꞌꞌ manˉ liáˍkuhˍs manˋ jonˉ:

---Manˉtáꞌ jmánˉ ngúnˉ guiohꞌ kíˉ ---juáhˉ tǿꞌꞌ tionhꞌꞌ.

Tsaøˉ meinhꞌꞌ zánhˉ jáhˉ éinˉ nénˍ, manˉtáꞌ juønˋ tsouˉ liáˍzounꞌꞌ guiohꞌs. Jmánhˍ tsouˉ niónˉ lóuˉ. Káˉnǿnˉpa tsǿꞌñinꞌ meinhꞌꞌ éinˉ tsaøˉ éinˉ guehˍ, guiaꞌꞌ jánhˍ taˉ mánˍiꞌꞌngǿnꞌꞌs iꞌꞌnaunˉ, guiaꞌꞌ jánhˍ taˉ taꞌꞌ ,líˉjmónꞌꞌs, jmonˍ tsaøˉ éinˉ. Tsouˉ tsøˉ káˉlóuˉ guiohꞌ tsaøˉ meinhꞌꞌ éinˉ nénˍ, juǿnhˉ minhꞌ lǿˉ ngǿnꞌꞌ iꞌꞌnaunˉ. Ñóunhˉpa tsøˉ tsaøˉ éinˉ liáˉkónhˉ nainhˍ tsoˋs iꞌꞌnaunꞌ. Iꞌꞌchiꞌꞌñounhꞌꞌ tsaøˉ jonˉ nénˍ, jonˉ káˉchoˋ janˉ jáhˉ ninꞌꞌkueꞌ guiohꞌ tsaøˉ éinˉ; jonˉ káˉjóunꞌꞌ tsaøˉ éinˉ guiohꞌ.

Kónˉnenˉpa káˉtóhˉ jauꞌ guiohꞌ tsǿꞌñinꞌ meinhꞌꞌ tsøˉnanhˍ jáhˉ iꞌꞌnaunˉ éinˉ.